![វេទិកាសម្ព័ន្ធសង្គមស៊ីវិល និងអាជ្ញាធរខេត្តបន្ទាយមានជ័យ ឧត្តរមានជ័យ និងសៀមរាប](https://csaf.org.kh/app/uploads/2023/05/fn-2018-03-07-15-41-45-2-1-1.jpeg)
(សៀមរាប)៖ វេទិកាសម្ព័ន្ធសង្គមស៊ីវិល (វ.ស.ស.) បានសហការជាមួយអាជ្ញាធរខេត្តបន្ទាយមានជ័យ ឧត្តរមានជ័យ និងសៀមរាប រៀបចំ «វេទិកាសន្ទនារវាងវេទិកាសម្ព័ន្ធសង្គមស៊ីវិល ជាមួយអង្គការ សមាគម សហជីព និងសហគមន៍» ចាប់ពីថ្ងៃទី០៥ ខែមីនា ដល់ថ្ងៃទី០៧ ខែមីនា ឆ្នាំ២០១៨ នៅក្នុងខេត្តបន្ទាយមានជ័យ ឧត្តរមានជ័យ និងសៀមរាប។
លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល បានអញ្ជើញចូលរួមជាគណៈអធិបតីជាមួយលោក ឈើយ ចាន់ណា អភិបាលរងនៃគណៈអភិបាលខេត្តបន្ទាយមានជ័យ លោក ឃិន ញ៉ាន អភិបាលរងនៃគណៈអភិបាលខេត្តឧត្តរមានជ័យ និងលោក ពៅ ពិសិដ្ឋ អភិបាលរងនៃគណៈអភិបាលខេត្តសៀមរាប ក្នុងវេទិកាសន្ទនាដាច់ដោយឡែកពីគ្នានៅខេត្តនីមួយៗ ដោយមានសមាសភាពចូលរួមជាច្រើន មកពីបណ្តាមន្ទីរ អង្គភាព ស្ថាប័នពាក់ព័ន្ធ ក្រុមប្រឹក្សាស្រុក ក្រុង ឃុំសង្កាត់ ព្រមទាំងតំណាងអង្គការ សមាគម សហជីព និងសហគមន៍នានានៅក្នុងខេត្តនីមួយៗ។
![](https://csaf.org.kh/app/uploads/2023/05/fn-2018-03-07-15-41-45-3-1-1-1-1024x576.jpeg)
ការរៀបចំវេទិកាសន្ទនានេះ មានគោលបំណងផ្សព្វផ្សាយអំពីតួនាទី និងបេសកកម្មរបស់ វ.ស.ស. ក៏ដូចជាការងារដែល វ.ស.ស. បានបំពេញនាពេលកន្លងមក។ ថ្លែងក្នុងវេទិកាសន្ទនាទាំងបីថ្ងៃនេះ លោកប្រធានក្រុមប្រឹក្សាភិបាល បានបញ្ជាក់យ៉ាងច្បាស់ថា វ.ស.ស. មិនមែនជាបញ្ញត្តិករគ្រប់គ្រងអង្គការសង្គមស៊ីវិលនៅកម្ពុជា ហើយក៏មិនមែនជាប្រតិបត្តិករដែលអនុវត្តគម្រោងនៅមូលដ្ឋានផ្ទាល់នោះដែរ។ វ.ស.ស. គឺជាអ្នកសម្របសម្រួលក្នុងការពង្រឹងពង្រីកកិច្ចសហប្រតិបត្តិការ និងភាពជាដៃគូអភិវឌ្ឍ រវាងរាជរដ្ឋាភិបាលនិងបណ្តាអង្គការសង្គមស៊ីវិលឱ្យកាន់តែប្រសើរឡើងថែមទៀត។
បន្ថែមពីនេះ វ.ស.ស. មានទិសដៅចូលរួមជំរុញការអភិវឌ្ឍកម្ពុជា តាមរយៈវិស័យអង្គការសង្គមស៊ីវិល ដោយការចូលរួមផ្តល់ គាំទ្រ និងជំរុញការអនុវត្តគម្រោងជាក់ស្តែងរបស់អង្គការសង្គមស៊ីវិល ដែលជាសមាជិករបស់ វ.ស.ស. សំដៅចូលរួមចំណែកជាមួយវិស័យឯកជន និងរាជរដ្ឋាភិបាល ដើម្បីលើកកម្ពស់សុខុមាលភាពប្រជាជន និងជំរុញការអភិវឌ្ឍសេដ្ឋកិច្ច សង្គមកិច្ចប្រកបដោយចីរភាព។
វេទិកាសន្ទនាទាំង០៣ថ្ងៃ ដែលបានរៀបចំឡើងដោយ វ.ស.ស. ក្រោមកិច្ចសហការ និងគាំទ្ររបស់អាជ្ញាធរថ្នាក់ខេត្តខាងលើ បានផ្តល់ឱកាស និងបើកទូលាយសម្រាប់ការជជែកពិភាក្សា និងពិគ្រោះយោបល់ដោយត្រង់ទៅត្រង់មក និងដោយផ្ទាល់រវាងអង្គការ សមាគម សហជីព និងសហគមន៍ ជាមួយរាជរដ្ឋាភិបាល អាជ្ញាធរពាក់ព័ន្ធ លើបញ្ហាប្រឈមជាក់ស្តែងនៅក្នុងមូលដ្ឋាន និងសំណូមពរផ្សេងៗរបស់ប្រជាពលរដ្ឋផងដែរ។ ជាលទ្ធផល បញ្ហាប្រឈមនិងសំណូមពរមួយចំនួន ត្រូវបានដោះស្រាយជាក់ស្តែងនៅក្នុងកិច្ចពិភាក្សា ហើយបញ្ហាមួយចំនួនទៀត ដែលទាមទារឱ្យមានការសិក្សាបន្ថែម និងដោះស្រាយក្នុងកម្រិតបច្ចេកទេសជំនាញ នឹងត្រូវយកទៅបន្តពិភាក្សាជាមួយអាជ្ញាធរ ស្ថាប័ន និងសមត្ថកិច្ចជំនាញ ដើម្បីស្វែងរកដំណោះស្រាយ៕
![](https://csaf.org.kh/app/uploads/2023/05/fn-2018-03-07-15-41-45-1-1-1-1-1024x576.jpeg)
![](https://csaf.org.kh/app/uploads/2023/05/fn-2018-03-07-17-50-55-3-1-1-1-1024x768.jpeg)
![](https://csaf.org.kh/app/uploads/2023/05/fn-2018-03-07-17-50-55-2-1-1-1-1024x576.jpeg)
![](https://csaf.org.kh/app/uploads/2023/05/fn-2018-03-07-17-50-55-3-1-1-2-1024x768.jpeg)
ព័ត៌មានស្រដៀងគ្នា
ពិធីប្រកាសទទួលស្គាល់ សមាជិកដៃគូសហប្រតិបត្តិការរបស់ វ.ស.ស ប្រចាំខេត្តបន្ទាយមានជ័យ និងខេត្តប៉ៃលិន
នាថ្ងៃទី២៨ ខែធ្នូ ឆ្នាំ២០២២ វ.ស.ស. បានរៀបចំពិធីប្រកាសទទួលស្គាល់ សមាជិកដៃគូសហប្រតិបត្តិការរបស់ខ្លួនប្រចាំខេត្តបន្ទាយមានជ័យ និងខេត្តប៉ៃលិន ក្រោមអធិបតីភាពឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមប្រឹក្សាភិបាល វ.ស.ស. ដោយមានការចូលរួមពី អង្គការ សមាគម សហជីព និងសហគមន៍នានាប្រចាំខេត្តទាំងពីរ។ការប្រកាសទទួលស្គាល់សមាជិកដៃគូសហប្រតិបត្តិការនេះ រៀបចំឡើងក្នុងគោលបំណងចូលរួមចំណែកដល់ការផ្សព្វផ្សាយអំពីគោលដៅអភិវឌ្ឍន៍ប្រកបដោយចីរភាពកម្ពុជា ដើម្បីឱ្យអង្គការសង្គមស៊ីវិលនៅក្នុងខេត្តបន្ទាយមានជ័យ និងខេត្តប៉ៃលិន បានស្វែងយល់និងជ្រួតជ្រាបកាន់តែច្បាស់ ឈានទៅបង្កើតភាពជាដៃគូសហការជាមួយភាគីពាក់ព័ន្ធ និងរាជរដ្ឋាភិបាល ក្នុងការធ្វើឱ្យសម្រេចបានតាមគោលដៅទាំង ១៨ចំណុច ប្រកបដោយជោគជ័យនៅឆ្នាំ២០៣០។ថ្លែងក្នុងពិធីនេះ ឯកឧត្តម កឹមរ័ត្ន វិសិដ្ឋ បានលើកទឹកចិត្តឱ្យអង្គការសង្គមការ សមាគម សហគមន៍ និងសហជីពដែលកំពុងប្រតិបត្តិការនៅខេត្តទាំងពីរ បន្តពង្រឹងកិច្ចសហប្រតិបត្តិការជាមួយរាជរដ្ឋាភិបាលឱ្យកាន់តែជិតស្និទ្ធថែមទៀត ក្នុងភាពជាដៃគូដោយឆន្ទៈស្មោះត្រង់ បន្តពង្រឹងសាមគ្គីភាពផ្ទៃក្នុង និងត្រូវគោរពច្បាប់ជាធរមាន ប្រកាន់ខ្ជាប់នូវអព្យាក្រឹតភាពផ្នែកនយោបាយ និងត្រូវបន្តចូលរួមចំណែកឱ្យកាន់តែសកម្មថែមទៀតក្នុងការអភិវឌ្ឍប្រទេសជាតិ ស្របតាមគោលនយោបាយរបស់រាជរដ្ឋាភិបាល។ ក្រៅពីនេះ ឯកឧត្តមក៏បានជំរុញឱ្យអង្គការសង្គមស៊ីវិលធ្វើសង្គតិភាពផែនការការងាររបស់ខ្លួន ដោយសហការឱ្យបានជិតស្និទ្ធជាមួយអាជ្ញាធរមូលដ្ឋាន ដើម្បីឲ្យស្របនឹងតាមផែនការអភិវឌ្ឍន៍ និងកម្មវិធីវិនិយោគបីឆ្នាំរំកិល របស់រដ្ឋបាលថ្នាក់មូលដ្ឋាន ដែលខ្លួនកំពុងប្រតិបត្តិការ។សូមបញ្ជាក់ថា វ.ស.ស. ត្រូវបានបង្កើតឡើងតាមរយៈអនុក្រឹត្យលេខ១២៩ អនក្រ.បក ចុះថ្ងៃទី២២ ខែមិថុនា ឆ្នាំ២០១៦ តាមការចង្អុលបង្ហាញពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងសម្របសម្រួលការងារសង្គមស៊ីវិល ដើម្បីសម្រេចបាននូវសុខដុមនីយកម្មសង្គមស៊ីវិលនៅកម្ពុជា ប្រមូលផ្តុំទស្សនៈ និងមតិយោបល់ពីសំណាក់ក្រុមបញ្ញវន្ត ក្រុមអ្នកស្រាវជ្រាវ បណ្ឌិតសភាចារ្យ និងសង្គមស៊ីវិល តាមរយៈការពិភាក្សា និងការស្រាវជ្រាវតាមបែបវិទ្យាសាស្ត្រ ហើយកិច្ចពិភាក្សា និងការស្រាវជ្រាវ ដែលនឹងត្រូវប្រើប្រាស់ជាធាតុចូលសម្រាប់ការរៀបចំនូវសំណើគោលនយោបាយថ្មីៗ ដែលបម្រើឱ្យផលប្រយោជន៍សាធារណៈ តាមគោលការណ៍ស្ម័គ្រចិត្ត។